इचलकरंजी : संपूर्ण भारतातून डीकेटीईमध्ये टेक्स्टाईलचे शिक्षण घेत असलेल्या दोन विद्यार्थ्यांची चीनमधील उहान युनिर्व्हसिटीत ‘मास्टर ऑफ फॅशन डिझायनिंग अॅंड इंजिनिअरींग’ या पदव्युत्तर अभ्यासक्रमासाठी निवड झाली आहे.
उहान युनिर्व्हर्सिटीने शैक्षणिक गुणवत्ता व व्हिडीओ कॉलिंग इंटरव्हयूव्दारे चीनच्या अधिकाऱ्यानी डीकेटीईच्या विद्यार्थ्यांची निवड केली आहे. डीकेटीईच्या विविध आंतरराष्ट्रीय विद्यापीठाशी असलेल्या सामंजस्य करारामुळे डीकेटीईतील बरेच विद्यार्थी आर्थिक कुवत नसतानाही उच्च शिक्षणासाठी परदेशात जाण्याचे आपले स्वप्न साकार करीत आहेत.
चीनमधील उहान युनिर्व्हसिटी हे वस्त्रोद्योग क्षेत्राशी निगडीत शिक्षण देणारे आघाडीचे विद्यापीठ आहे. ही युनिर्व्हसिटी संपूर्ण आशिया खंडातून मोजक्याच विद्यार्थ्यांची स्कॉलरशिपसाठी निवड करते. यावर्षी संपूर्ण भारतातून डीकेटीईचे दोन विद्यार्थी सुरज साखरपे व राकेश खंडेलवाल यांची निवड झाली आहे.सध्या हे विद्यार्थी उहान विद्यापीठामध्ये प्रथम वर्षात शिक्षण घेत आहेत.
निवड झालेल्या विद्यार्थ्यांचे संस्थेचे चेअरमन कल्लाप्पाण्णा आवाडे, माजी वस्त्रोद्योग मंत्री प्रकाश आवाडे, सचिव. डॉ सपना आवाडे व सर्व ट्रस्टी यांनी अभिनंदन केले. या विद्यार्थ्यांना इन्स्टिटयूटचे डायरेक्टर प्रा. डॉ. पी. व्ही. कडोले, डेप्युटी डायरेक्टर प्रा. डॉ. यु. जे. पाटील, प्रा.एम.वाय. गुडीयावर व प्रा. व्ही.के.ढंगे यांचे मोलाचे मार्गदर्शन मिळाले.
प्राध्यापकांचे मार्गदर्शन व कुटुंबियांचे सहकार्य यामुळेच हे यश प्राप्त झाल्याची भावना विद्यार्थ्यांनी व्यक्त केली. विविध आंतरराष्ट्रीय इन्स्टिटयूट व इंडस्ट्रीजशी असलेल्या सामंजस्य करारामुळे डीकेटीईच्या विद्यार्थ्यासाठी युरोपबरोबरच चीनमध्येदेखील आता उच्चशिक्षणाच्या संधी उपलब्ध झाल्या आहेत. याआधीही डीकेटीईचे उमेश पाटील, मोसीन नाईकवडे, उमर इनामदार, राहूल नावीक, शिवराज कारंडे या विद्यार्थ्यांनी उहान येथे शिक्षण संपादन केले आहे. हे सर्व विद्यार्थी विविध ठिकाणी उच्च पदावर कार्यरत आहेत.